Tannie Rose vier 103 pragjare

Dis nie aldag dat ‘n Roodepoort pensioentrekker 103 word nie, maar tannie Rose Binda kan darem sê sy het dit in styl gevier.

Tannie Rose het haar 103de verjaarsdag Vrydag 7 Augustus saam met die personeel van Roodepoort Sentrum vir Bejaardes, waar sy bly gevier. Die saal waarin hul gekuier het is stylvol versier met pragtige tafeldoeke en heerlike eetgoed.

Sister Susan Wepener het gesê sy werk al vyf jaar met die tannie wat tans in die siekeboeg ‘n kamer met ‘n ander vrou deel. Maatskaplike werker Lizbe von Moltke vertel sy is baie aktief vir haar ouderdom en sit gereeld en dingetjies brei.

“Laasjaar het sy nog hier gesit en Sudoku-blokkies invul,” het Lizbe gesê.

Rose ‘Rosie’ Binda is op 7 Augustus 1912 in Grahamstad gebore. Sy was die derde van 10 kinders en het altyd gespot dat sy nie tweedehandse nie, maar derdehandse klere moes dra. Sy is aan ‘n Portugese mynkaptein van Beira in 1937 getroud en hulle het meer as 50 jaar saam spandeer voor hy aan kanker dood is. Die paartjie het twee seuns gehad waarvan een oorlede is. Haar ander seun bly tans in Zimbabwe.

Rose het baie jare in die finansiële industrie spandeer en het veral haar werk by La Mode Dress Shop geniet.

Volgens een van haar familielede Una Webster glo Rose daarin om in vrede en harmonie saam met ander te leef. Sy glo hierdie uitkyk op die lewe het haar bygestaan om die gesonde, gelukkige 103-jarige te wees wat sy is.

Webster het gesê die familie is dankbaar en geseënd om Roodepoort Sentrum vir Bejaardes te kon vind wat vir haar uitstekende sorg bied.

Sou jy graag nuusflitse via WhatsApp wil ontvang? Stuur ‘n SMS/ WhatsApp boodskap met jou naam en selfoonnommer na 079 414 6709.

Maak seker dat U kennis neem van ons WhatsApp-vrywaring

Het jy dalk meer inligting rakende dié storie? Stuur gerus vir ons ‘n e-pos na roodepoortrecord@caxton.co.za (sluit asseblief kontakbesonderhede in) of skakel ons by 011 955 1130.

Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes Randfontein Herald,  Krugersdorp News en Get It Joburg West Magazine

Besoek ook ons Facebook, Twitter en Instagram blaaie om jou stem te laat tel!